كيفاش تعمل توجيه باهي .. مهم

كيفاش تعمل توجيه باهي

1/ أحسب السكور متاعك ب 7% و منغير 7%

2/أفهم شنوة معناها 7% و وقتاش تتمتع بها

3/خوذ فكرة سطحية على الميادين المجودة ( أعلامية ، حقوق ، اقتصاد ، شبه طبي ، علوم انسانية ...)

4/fixi روحك في ميدان و لا زوز ألي أكثر تميللهم و أكثر ميادين تحس روحك حسب profill متاعك تتفوق فاهم ،

5/ ماتففاش على بدنك ، أنتي خايب في المات و ماكش خدام و تخمم في البربا مثال

6/بعد ما fixitt الميدان متاعك ، شوف الشعب ألي موجودة في الميدان ألي حطيتو ، و يكونو قراب لسكورك (يفوتو سكورك ب 10 نقاط أكثر حاجة و ألي أقل من سكورك الكل )

7/أعمل قائمة بالشعب هاذم ، قائمة فيها حتى 20 أو 30 شعبة نورمال و رتبهم حسب السكور

8/ زيد رتب الشعب هاكم ترتيب آخر حسب المعهد و الجامعة ....مثال عندك في فاك الفولنية زوز شعب حطهم في قائمة وحدهم

9/كي تجي ترتب و تلقى شعبة انتي تميللها و قريبة لسكورك أما في بلاصة بعيدا ماتحقرهاش و حطها في القائمة ميسالش

10/ بعد مارتبت أبدا اسئل على كل شعبة ، شنوة الأختصاصات ألي فما ، شنوة الأفاق ، شنوة تنجم تخدم بيها ، تنجم تعمل بيها هندسة ، تنجم تعمل بيها مجيستار ، تنجم تعمل بيها دكتورا ، تنجم تعدي بيها مناظرات معينة ، شنوة المواد ألي فيها ، شنية توصل ، قيمة الشهادة في الحياة المهنية ، مطلوبة في سوق الشغل أو لا ، قداش من عام تقرى ، ألخ ..

11/ بعد ماتسأل و تبحث على الشعب ، تقوم بالبحث على الجامعة في كل شعبة ، فين موجودة ، سيستام متحها ، نسبة النجاح فيها ، عدد الطلبة فيها ، شنوة فيها نشاطات من نوادي و غيرو ، الأساتذة كيفا ألي فيها ، المبيت بعيد عليها أو لا ، باهية بلاصة الفاك أو لا ، فما نقل أو لا ، فيها منح لخارج أو لا ، فيها مرحلة ماجسيتير أو هندسة أو دكتورة أو لا ؟ ألخ ....و بنفس الفيديو تنجم تعرف

12/ بعد معرفة هذا الكل القائمة ألي عملتها ملي كانو فيها 30 أو 20 اختيار باش ينقصو يوليو حتى 12 أو 11 ....

13/آقف أعمل نظرة تأمل لاختيارات و زيد خمم

14/ اقرا المنشورات ألي في مجموعة الأتحاد ألي في الفهرس ألي يحكيو على دورات التوجيه ،و سكور يطيح أو لا ، ألخ ألخ من المنشورات

15/ماتسمعش برشا كلام عباد ماتفهمش  في التوجيه أو تقلق الفاك هاكي ""خير " أو شعبة هاكي ""خير " منغير تفسير أو اقناع أو غيرو ...

16/لازمك انترنات للتوجيه ،،و الحمد الله تو كل شيء متفوفر

17/ ماتخلي حد يدبر عليك

18/ و أهم شيء اسئل على مابعد الأجازة أو المرحة الأولى شنوة فما ..... خاطر 3 سنين يتعدو فيسع و بعد تحب تكمل تقرى أما ماكش عارف كيفا

19/ رد بالك تسئل واحد يعطيك وجهت نظر متاعو على شعبة أو فاك ..خاطر كان هو مسلكها باش يقلك تحفونة و كان لا باش يقلك على الحيط هذي خوذها قاعدة

20/ اسئل أبناء الأتحاد في المجموعة هاذي ألي موجودين في كل المعهاد في الجمهورية

21/ و آخر شيء دعاء الوالدين و عدم التسرع و لازم السعي و تقوم بمجهود ماتستناش واحد باش يجي يعمرك التوجيه ...هذا مستقبلك